སྙིང་བོ།

རང་བཞིན་སྟོང་བ་ཡིན་པས་ཆགས་སྡང་གིས་བསླུ་བྲིད་མི་ཐེབས་པར།
སྣང་ཚུལ་རྟེན་འབྱུང་ཡིན་པས་གང་དྲན་གྱི་རྗེས་སུ་མི་འགྲོ་ནས།
བླ་མ་བཟང་པོ་མིག་གིས་མཇལ།
ཆོས་བདེན་པ་སེམས་ཀྱིས་མྱོང་བས།
ཤི་གསོན་གཉིས་ཀར་ཞེ་མི་འཁྲི་བ་ཞིག་ཏུ་གྱུར་ན།
ཡིད་མགུ་སྟེ་སེམས་ལྷོད་ཆགས་པར་བྱ་ཆོག།

ཐེངས་འདིར་མི་རུ་སྐྱེས་ཤིང་།
དམྱལ་བར་མ་ལྷུང་བ་འདིས།
ཡིད་མ་ཚིམ་སྟེ།
སླར་ཡང་མི་རུ་སྐྱེ་དགོས་པའི་སྒེར་སེམས་མི་འཆིང་བར།
ཚེ་འདི་དོན་ཡོད་ཅིང་ཡིད་དུ་འོང་ན།
སྐྱེ་འཆི་ལ་རེ་དོགས་མེད་པར་གྱུར་ན།
མི་རུ་སྐྱེས་པ་འདི་ཡིས་ཆོག།

མི་ལ་རས་པ་ཡིས་ཀྱང་།
ངན་སྔགས་བསླབས་རྗེས།
མཐུ་གྲུབ་རྗེས།
དགྲ་བཏུལ་རྗེས།
གཉེན་བསྐྱངས་རྗེས།
གཞི་ནས་འཁོར་བ་ལ་ཞེ་ལོག་སྟེ།
རས་པ་ཁེར་འགྲོ་བྱས་ཏེ།
ནུབ་པ་མེད་པའི་སེམས་ཀྱི་ཕར་ཕྱིན་རྫོགས་པ་མ་ཡིན་ནམ།

འབྲི་མཁན་ཨ་ཀྲོང་།2023-12-21

ཧོར་སོག་འཇིགས་པའི་དམག་གིས་བོད་ཁམས་བཅོམ། །དྭགས་བརྒྱུད་བསྟན་པ་ནུབ་རིའི་ཕག་ཏུ་སྐྱེལ། །བཀའ་དགོན་ཕལ་ཆེར་བྲན་དུ་གྱུར་པའི་དུས། །སེར་འབྲས་ཁྲི་ལ་སི་ཏུ་པཎ་ཆེན་འགྱིངས། །མི་དབང་ཕོ་ལྷས་གསེར་གྱི་དགྱེས་ཞལ་གཟིགས། །མདོ་ཁམས་ཞབས་དྲུང་ཅོད་པན་ཞབས་ཀྱིས་བླངས། །བོད་ཁམས་ཡོངས་ལ་བརྡ་སྤྲོད་བསྟན་པ་སྤེལ། །ཐུ་མི་གཉིས་པ་ཆོས་ཀྱི་འབྱུང་གནས་གྲགས། །
___རྒན་ཐུབ་ཕུན་ལགས།

འོད་དུ་འཚེར་བའི་ཉི་ཟླ་ལྟ་བུའི་སྐྱེས་ཆེན་དམ་པ་དག་གཅིག་རྗེས་གཉིས་མཐུད་ཀྱིས་འདི་ལྟར་ནུབ་རིར་ཡིབས་སོང་ན། ང་ཚོ་ནི་དངངས་འཚབ་ཆེ་བའི་མུན་པ་མུན་ནག་གི་འཇིག་རྟེན་གྱི་རུ་གྲོང་ཞིག་ན་ཤུལ་དུ་ལུས་པའི་ཉམ་ཐག་དང་འདྲ།

བཤེས་གཉེན་ལགས། ཕེབས་པ་སྔ་དྲགས་སོང་། ཤིན་དུ་ཕང་། ཤིན་ཏུ་སྐྱོ། སླར་ཡང་རྗེས་སུ་འཛིན་པར་སྨོན།