བོད་ལ་སྐུ་དྲིན་གཞལ་མཐའ་བྲལ་བའི་མཁན་ཆེན་མཆོག་གི་གཙོས་པའི་བོད་གངས་ཅན་པའི་སྲོག་རྩ་སྲུང་བའི་ལྕགས་རི་ལྟ་བུའི་དཔུང་ཆུང་འདི་དག་གིས་དུས་རབས་ཀྱི་འདུ་ལོང་ཤིག་ཤིག་ཡོམ་ཡོམ་དུ་འགྲོ་བཞིན་པའི་གཡུལ་ས་དེ་ནས།སྐུ་གསུང་ཐུགས་གསུམ་གྱི་ངལ་བ་གང་མང་བར་དུ་མཛད་དང་མཛས་མུས་སུ་མཆིས། འོན་ཀྱང་ང་ཚོའི་གཞོན་སྐྱེས་ཤ་དར་ཁྲག་དར་ཅན་མང་ཤས་ཤིག་སྤྲེས་སྐད་ཀྱི་བཀག་རྒྱ་རུ་ཚུད་ཅིང་རང་ཉིད་བོད་ཡིན་པ་བརྗེད་ཀྱིན་པ་འདི་མཚར་ཨང་།

གཎྜི།

མཁའ་མཉམ་འགྲོ་ལ་མཁྱེན་བརྩེས་རབ་དགོངས་ནས། །
གྲངས་མེད་གསུམ་དུ་ཚོགས་གཉིས་རབ་རྫོགས་ཏེ། །
སྟོང་གསུམ་མི་མཇེད་ཞིང་གི་དཔལ་གྱུར་པ། །
འདྲེན་མཆོག་ཤཱཀྱའི་ཏོག་ལ་ཕྱག་འཚལ་ལོ། །

མཁན་ཆེན་བསོད་དར་རྒྱས་ཀྱི་ཞབས་བརྟན།

གཟན་དཀར་རིན་པོ་ཆེས་མཛད།

སྟོན་མཆོག་མཉམ་མེད་ཐུབ་དབང་སྲས་དང་བཅས། །
འཕགས་བོད་པཎ་གྲུབ་བདེན་ཚིག་གྲུབ་པའི་ཚོགས། །
ཁྱད་པར་ཚེ་ལ་དབང་བའི་རིག་འཛིན་བཅས། །
དེང་འདིར་དགེ་ལེགས་སྣང་བའི་ཤིས་པ་སྩོལ། །

མཁྱེན་པའི་ཤེས་རབ་མཁའ་ཡི་འོད་སྣང་གསལ། །
བྱམས་བརྩེ་ལྷག་བསམ་དུང་གི་ཟླ་བ་མཛེས། །
མཁྱེན་གཉིས་ཉི་ཟླ་ཟུང་གི་རྣ་ཆ་ཅན། །
བསྟན་འགྲོའི་གཉེན་གཅིག་སྐུ་ཚེ་བརྟན་པར་ཤོག །

ཤེས་རིག་རིན་ཆེན་ནོར་གྱི་བང་མཛོད་ཆེས། །
ས་ཆེན་གོ་ལའི་ཁྱོན་འདི་ཡོངས་བཀང་སྟེ། །
བརྒྱུད་འཛིན་བུ་སློབ་རྒྱུ་སྐར་བྱེ་བའི་གྲངས།།
སྐྱོང་མཛད་སྐྱེས་ཆེན་དམ་པའི་ཞབས་བརྟན་གསོལ།།

མཆོག་གསུམ་རྩ་གསུམ་སྲུང་མའི་བྱིན་རླབས་དང་།།
ཚེ་འཛིན་གྲུབ་པའི་ཚོགས་ཀྱི་བདེན་སྟོབས་ཀྱིས།།
ཚེ་ཡི་མི་མཐུན་བར་ཆད་ཀུན་ཞི་ནས།།
སྨྲ་བའི་ཁྱུ་མཆོག་ཞབས་པད་བརྟན་གྱུར་ཅིག།

མི་ཤིགས་མི་འགྱུར་གསང་བ་སྐུ་ཡི་ཁམས།།
མི་འགག་མི་འགྱུར་གསང་བ་གསུང་གི་ཁམས།།
མི་གཡོ་མི་འཕོ་གསང་བ་ཐུགས་ཀྱི་ཁམས།།
གསང་གསུམ་རྡོ་རྗེའི་ཁམས་སུ་བརྟན་གྱུར་ཅིག།

ཅེས་པ་འདི་སྙིགས་དུས་ཀྱི་སྐྱེ་འགྲོའི་མགོན་དང་དཔུང་གཉེན་དམ་པར་གྱུར་པ་མཁན་རིན་པོ་ཆེ་བསོད་ནམས་དར་རྒྱས་ལགས་སྙུན་གཞི་ལས་གྲོལ་བའི་མཐུན་རྐྱེན་དུ་ཤར་མི་ཉག་འཁྱམ་པོ་པ་ཐུབ་བསྟན་ཉི་མར་འབོད་པ་དེས་རྩེ་གཅིག་ཏུ་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག །