ཕན་མཛད་དེ་ཡི་བསྟན་པའང་སྲིད་པའི་མཐར། །ངན་རྟོག་རླུང་གིས་རྣམ་པར་མི་གཡོ་ཞིང་། །བསྟན་པའི་ངང་ཚུལ་ཤེས་ནས་སྟོན་པ་ལ། །ཡིད་ཆེས་རྙེད་པས་རྟག་ཏུ་གང་བར་ཤོག།

མིར་སྐྱེས་ཀྱང་མི་ལས་བརྒལ་བའི་སྐྱེས་བུ།

_________ ཀིར་སྒར་ཕུན་ཚོགས།

སྡུག་བསྔལ་རྒྱུ་དང་རྟག་ཏུ་བདེ་བའི་གནས།།
གང་ཡིན་རང་གིས་རང་ལ་དྲི་བ་བསྐུལ།།
བདེན་པའི་ཆེད་དུ་རྒྱལ་སྲིད་བློས་གཏོང་བ།།
རྒྱལ་སྲས་དོན་གྲུབ་གཽ་ཏམ་བུ་དེར་འདུད།།

རང་གི་མགོན་དང་རང་གི་དགྲ་དཔུང་ལ།།
རང་ཉིད་གཏད་དེ་རྣམ་དག་རིག་སྟོབས་ཀྱིས།།
བསྲེག་བཅད་བརྡར་བའི་ངེས་ཤེས་འདྲེན་པར་གདམས།།
རང་ཉིད་རྒྱལ་བའི་ལྷ་མཆོག་ཤཱཀྱར་འདུད།།

ཟག་བཅས་བདེ་བའི་འདོད་འདུན་རིང་དུ་དོར།།
ཏིང་འཛིན་ཞི་བའི་འཆར་སྣང་ཡིད་དུ་ཕབ།།
ཡང་དག་ལམ་དང་ཡང་དག་ལྟ་བ་དང་།།
ཡང་དག་ཆོས་ཀྱི་རྒྱལ་ཁམས་གསར་དུ་བསྐྲུན།།

ཡང་དག་གནས་ལུགས་བདེན་བཞིའི་འགྲོས་སུ་བཏེགས།།
རྟེན་འབྱུང་ཆོས་ཉིད་གྲུབ་པའི་གཤིས་ལུགས་ལ།།
རྣམ་འབྱེད་ཤེས་རབ་གཏམ་གྱིས་རང་སྒྲ་བསྒྲོགས།།
རྒྱལ་བ་ཡང་དག་སྨྲ་བའི་མགོན་དེ་རྒྱལ།།

སེམས་ཅན་ཁམས་དང་མོས་པ་བག་ཆགས་སུ།།
འཁོར་གསུམ་ཐེག་ལུགས་བདེན་པའི་གཏམ་དུ་བྱས།།
དྲང་དོན་ངེས་དོན་ལྡེམ་དགོངས་མན་ངག་སྦར།།
མི་རུ་སྐྱེས་པ་ལྷ་ཡི་མཆོག་གྱུར་རྒྱལ།།

_______ དེ་ཝི་ཀོ་ཊའི་ལུང་པ་ནས།

བཀའ་གདམས་ཀྱི་སྐྱེས་བུ་དམ་པ་རྣམས་ཀྱི་གསུང་བགྲོས་ཐོར་བུ།

བདུན་པ
ཡང་འབྲོམ་སྟོན་པ་ལ་སྐུ་མཆེད་གསུམ་གྱིས་བདག་དོན་དང་གཞན་དོན་ཕུན་སུམ་ཚོགས་པ་བྱེད་པ་ལ་ལྟ་བ་དང་སྤྱོད་པ་གཉིས་གལ་གང་ཆེ་ལགས་ཞུ་པས། སྟོན་པའི་ཞལ་ནས། རྟེན་གྱི་གང་ཟག་ཅིག་ཐེག་པ་ཆེན་པོའི་སྒོར་ཞུགས་ནས། བདག་གཞན་གྱི་དོན་ཕུན་སུམ་ཚོགས་པར་བྱེད་པ་ལ། ལྟ་བ་རྣམ་པར་དག་པ་དང་། སྤྱོད་པ་རྣམ་པར་དག་པ་གཉིས་ཟུང་དུ་འབྲེལ་དགོས། ཡ་བྲལ་གྱིས་མི་གཏུབ་གསུང་། འོ་ན་ལྟ་སྤྱོད་རྣམ་པར་དག་པ་ཇི་ལྟར་ལགས་ཞུས་པས། སྟོན་པའི་ཞལ་ནས། ལྟ་བ་རྣམ་པར་དག་པ་ནི་དོན་དམ་པར་ཆོས་ཐམས་ཅད་དངོས་པོ་ཅིར་ཡང་མ་གྲུབ་པས་ཡོད་མེད་རྟག་ཆད་ལ་སོགས་པའི་མཐའ་ཐམས་ཅད་རྨི་ལམ་སྒྱུ་མ་སྤྲུལ་པ་ལྟ་བུར་ཤེས་ཤིང་། དེ་ཡང་རང་གི་སེམས་སྣང་འབའ་ཞིག་ཏུ་རྟོགས་ཏེ། དངོས་པོ་གང་ལ་ཡང་ཡིད་མི་གཏོད་ཅིང་གང་གི་ཡང་རྗེས་སུ་མི་འབྲང་བ་ཅིག་ཡིན། སྤྱོད་པ་རྣམ་པར་དག་པ་ནི། ཀུན་རྫོབ་རྨི་ལམ་སྒྱུ་མ་ཙམ་དུ་ལས་དཀར་ནག་གི་འབྲས་བུ་མི་བསླུ་བར་ཤེས་ཏེ། ལས་རྒྱུ་འབྲས་ལ་འཛེམ་ཞིང་། དེ་ལྟར་མ་རྟོགས་པའི་སེམས་ཅན་རྣམས་ལ་སྙིང་རྗེ་ཆེན་པོས་སེམས་ཅན་གྱི་དོན་ལ་བརྩོན་པ་ཅིག་ཡིན། དེ་ལྟ་བུའི་ལྟ་སྤྱོད་རྣམ་པར་དག་པ་དེ་ཡང་བྱང་ཆུབ་ཀྱི་སེམས་རྣམ་པ་གཉིས་རྒྱུད་ལ་སྐྱེས་པ་ཅིག་ལ་ངང་གིས་འབྱུང་གསུང་།   

འོ་ན་ལྟ་སྤྱོད་ཡ་བྲལ་བ་ལ་སྐྱོན་ཅི་ཡོད་ཞུས་པས། སྟོན་པའི་ཞལ་ནས། ལྟ་བ་རྣམ་པར་དག་པ་ཅིག་ཡོད་ཀྱང་སྤྱོད་པ་རྣམ་པར་མ་དག་སྟེ། ལས་རྒྱུ་འབྲས་ལ་མི་འཛེམ་ཞིང་སྤྱོད་པ་རྩིང་པོར་ཤོར་ན་བདག་གཞན་གཉིས་ཀའི་དོན་མི་ནུས་ཏེ་ལྟ་བ་དེ་ཡང་གོལ་བར་འགྲོ། སྤྱོད་པ་རྣམ་པར་དག་པ་ཅིག་ཡོད་ཀྱང་དངོས་པོའི་གནས་ལུགས་མ་རྟོགས་ན་བདག་གཞན་གཉིས་ཀའི་དོན་མི་ནུས་ཏེ་སྤྱོད་པ་དེ་ཡང་གོལ་བར་འགྲོ། དེས་ན་ལྟ་སྤྱོད་ཟུང་དུ་འབྲེལ་ནས་ལམ་ལོག་པར་ལྟུང་བས་ཟུང་འཇུག་ལ་བསླབ་དགོས་གསུང་། 

མུ་འགོད།  https://t.cn/z8Ac3wc