༄༅།།༧རྒྱལ་དབང་ཀུན་མཁྱེན་མི་བསྐྱོད་རྡོ་རྗེའི་རྟོགས་པའི་གདེང་མགུར།༽

སྔོན་བསགས་བསོད་ནམས་ལུས་ལ་ཡོངས་འཛིན་བསྟེན། །
སངས་རྒྱས་སྒྲུབ་པའི་ཐབས་ལ་རྨོངས་པ་བྲལ། །
ངེས་འབྱུང་ཅན་འགས་བསྟེན་ན་དགོས་འདོད་འབྱུང༌། །
ཐར་འདོད་རྣམས་ཀྱིས་ང་ཡི་རྣམ་ཐར་སོམས། །

བརྒྱུད་པ་གཞན་ལ་འགྲམ་ཆུ་མི་ལྡང་བ། །
འགྲོ་མགོན་དྭགས་པོའི་བཀའ་བརྒྱུད་བྱིན་རླབས་ཅན། །
ཡོངས་འཛིན་གཞན་གྱིས་སེམས་ཁ་མི་ལྷོངས་པའི། །
སངས་རྒྱས་སྤྲུལ་སྐུའི་བླ་མ་ཐུགས་རྗེ་ཅན། །

དམ་ཆོས་གཞན་ལ་ཡིད་སྨོན་མི་དགོས་པའི། །
ན་རོ་མཻ་ཏྲིའི་གདམས་ངག་ཡིད་ལ་གཅགས། །
སྒྲ་བསྒྱུར་སོ་སྐྱེའི་ཞུ་དག་མ་དགོས་པར། །
དགྱེས་རྡོར་མར་པ་ལོ་ཙཱས་གཏན་ལ་ཕབ། །

བརྒྱུད་པ་བཅུ་གསུམ་བར་དུ་བྱིན་རླབས་པའི། །
མཁའ་འགྲོའི་དབང་ཕྱུག་མི་ལའི་དངོས་གྲུབ་མཚར། །
སྲིད་པ་ཐ་མའི་བྱང་སེམས་རྫུ་འཕྲུལ་ཅན། །
མཉམ་མེད་དྭགས་པོ་དཔོན་སློབ་ཉིད་དུ་གསལ། །

ངན་སོང་མི་ཟད་བར་དུ་རྟག་པའི་སྐུ། །
དཔལ་ལྡན་ཀརྨ་པ་དེའི་མཛད་པ་ཡིན། །
བདག་ཀྱང་དེའི་རྗེས་སུ་འཇུག་རློམ་ནས། །
སྙིང་ཁུང་རུས་པའི་གཏིང་ནས་དང་བ་སྐྱེས། །

ཞེས་གསུངས་པའི་རྟོགས་པའི་གདེང་མགུར་འདི་ནི་ཀུན་མཁྱེན་བླ་མ་རྒྱལ་དབང་མི་བསྐྱོད་རྡོ་རྗེའི་མགུར་འབུམ་ལས་བཤུས།༽ དགེ་ལེགས་སུ་གྱུར་ཅིག། །།

༄༅།།༧རྒྱལ་དབང་ཀརྨ་པ་ཀུན་མཁྱེན་མི་བསྐྱོད་རྡོ་རྗེའི་རྟོགས་པའི་གདེང་མགུར།༽

ཕ་རྟོགས་ལྡན་གྱི་རྒྱལ་པོ་བླ་ན་མེད། །
རྗེ་གྲུབ་ཆེན་སངས་རྒྱས་རྡོ་རྗེ་འཆང༌། །
དུས་ལན་ཅིག་མིན་པར་དྲན་ཞིང་གདའ། །
གསོལ་བ་སྙིང་གི་དཀྱིལ་ནས་གདབ། །
དུས་དིང་སང་བླ་མ་ཡང་ཡང་དྲན། །

ད་དལ་འབྱོར་རྙེད་དཀའ་སྙིང་ནས་དྲན། །
ལར་འཆི་བ་མི་རྟག་རྒྱུད་ལ་སྐྱེས། །
ལས་དང་རྒྱུ་འབྲས་མངོན་སུམ་གྱུར། །
མཚན་ལྡན་བླ་མའི་བྱིན་རླབས་ཡིན། །

འཁོར་བ་ལ་སྡུག་བསྔལ་བཟོད་ཐབས་མེད། །
ཐར་པ་ལ་ཐེ་ཚོམ་གཏན་ནས་ཟད། །
སྐྱབས་དཀོན་མཆོག་གསུམ་ལ་བློ་གདེང་ཁེལ། །
མཚན་ལྡན་བླ་མའི་བྱིན་རླབས་ཡིན། །

མཐའ་མེད་ཀྱི་སེམས་ཅན་ཕ་མར་ཤེས། །
རང་དོན་གྱི་རྣམ་རྟོག་ཡིད་ལ་མེད། །
ལྷག་བསམ་གྱི་བློ་གྲོས་གོང་དུ་བྱང༌། །
མཚན་ལྡན་གྱི་བླ་མའི་བྱིན་རླབས་ཡིན། །

ཐ་མལ་གྱི་རྣམ་རྟོག་གཏིང་ནས་ཟད། །
གསང་ཆེན་གྱི་དགའ་བཞི་རང་ངོ་འཕྲོད། །
ཆགས་སྡང་གི་འཁྲུལ་པ་གཏན་ནས་ཟད། །
མཚན་ལྡན་གྱི་བླ་མའི་བྱིན་རླབས་ཡིན། །

ད་འཇིག་རྟེན་གྱི་བསམ་པ་སེམས་ལ་མེད། །
མ་ཉན་དོགས་པའི་ཕྱིས་ཤོམས་མེད། །
གང་བྱུང་ཤོག་པའི་བློ་གདེང་ཡོད། །
མཚན་ལྡན་བླ་མའི་བྱིན་རླབས་ཡིན། །

གྲོགས་དང་ཉེ་དུའི་གདུང་སེམས་མེད། །
སྡེ་དང་ཚན་ཀའི་ཕྱོགས་རིས་མེད། །
བསག་བསྲུང་འཚོ་སྐྱོང་གི་སེམས་ལས་མེད། །
མཚན་ལྡན་བླ་མའི་བྱིན་རླབས་ཡིན། །

དགྲ་དང་གཉེན་གྱི་གདུལ་སྐྱོང་ཞིང༌། །
ཐ་སྙད་སློབ་མའི་སེམས་ཁྲལ་མེད། །
སྡེ་དགོན་ཚོགས་པའི་གཉེར་ཀ་མེད། །
མཚན་ལྡན་བླ་མའི་བྱིན་རླབས་ཡིན། །

བྱ་བ་ཐམས་ཅད་གཏིང་ནས་བཏང༌། །
ཞེན་པ་ཐམས་ཅད་ཞེ་ནས་ཞིག །
ངོ་བསྲུང་མཐུན་འཇུག་རྣམ་གཡེང་བོར། །
མཚན་ལྡན་བླ་མའི་བྱིན་རླབས་ཡིན། །

ཚུལ་འཆོས་ཀྱི་མདུད་པ་ནང་ནས་གྲོལ། །
བག་མེད་ལ་གདུལ་སྦྱོང་གནད་ནས་ཐེབས། །
སྒོ་གསུམ་ལ་གཡོ་སྒྱུའི་སྤྱོད་པ་བྲལ། །
མཚན་ལྡན་བླ་མའི་བྱིན་རླབས་ཡིན། །

ཆོས་བརྒྱད་ཀྱི་ང་རྒྱལ་རྩད་ནས་ཟད། །
ཕྲག་དོག་གི་འགྲན་སེམས་རྒྱུད་ལ་མེད། །
གང་བྱུང་གི་གནས་གྲོགས་ཁོ་ཐག་ཆོད། །
མཚན་ལྡན་བླ་མའི་བྱིན་རླབས་ཡིན། །

ཕ་བཀའ་བརྒྱུད་ཀྱི་ལྷ་ཚོགས་སྐར་ལྟར་བཀྲ། །
ཡི་དམ་གྱི་དངོས་གྲུབ་ཚུལ་བཞིན་ཕབ། །
མཆོག་ཐུན་མོང་གི་དངོས་གྲུབ་ཅི་ཡང་ཤར། །
མཚན་ལྡན་གྱི་བླ་མའི་བྱིན་རླབས་ཡིན། །

༼ཀུན་མཁྱེན་བླ་མ་རྒྱལ་དབང་ཀརྨ་པ་མི་བསྐྱོད་རྡོ་རྗེའི་མགུར་འབུམ་ལས་བཤུས།༽

#微博[超话]# ༄༅། །དུས་རབས ༡༧-༡༨ བར་ཨིན་ཇིའི་རྟེན་མཛོད་ཁང ( The British museum ) དུ་ཉར་བའི་རྒྱལ་པོ་རཱ་མ་ཡ་ཎ་དང་སྲིན་པོའི་རྒྱལ་པོ་ལང་ཀ་མགྲིན་བཅུ་གཉིས་འཐབ་བཞིན་པའི་པར། རྒྱལ་པོ་རཱ་མ་ཡ་ཎ་སྤྲེའུ་ཧ་ནུ་མན་ཐའི་ཕྲག་སྟེང་དུ་ལངས་ཏེ་སྲིན་པོའི་རྒྱལ་པོ་ལང་ཀ་མགྲིན་བཅུར་རྒོལ་བཞིན་པའི་ཚུལ།