དེ་རིང་ང་རྫི་བོ་ཡིན།

ངས་མཐིང་སྨུག་སྦྲ་ནག་གི་འདབས་རོལ་ན་སྐོར་བའི་ལྷས་ར་གྲུ་བཞི་ལས་གཡང་གི་སྒོ་ཕྱུགས་དག་ཕྱི་རུ་ཕུད་དེ།

ནོར་ནག་གི་རྗེས་འབྲང་ནས་དལ་གྱིས་རི་ལ་སོང་།

དུས་ཚིགས་འདི་དབྱར་གཞུང་རིང་མོ་སྟེ། རྩྭ་ཆུ་འཛོམས་ཤིང་རི་ལུང་ལ་མཛེས་སྡུག་གི་ལང་ཚོ་རྫོགས་ཡོད།

དེ་ནི་མི་རྣམས་ཀྱི་སེམས་པའི་དཔལ་ཡོན་སྐྱིད་ལ་འཁོར་བའི་དུས་ཚིགས་ཤིག་ཀྱང་ཅི་ནས་ཡིན་མོད།

འབྲོག་ཕྱོགས་ལ་མཚོན་ན་དཀའ་ངལ་ཆེས་ཆེ་བའི་དུས་ཚིགས་ཤིག་ཡིན།

ངས་ནོར་ཁྱུ་སྒང་ནས་འཚོ་བཞིན་པའི་སྐབས་ལ། གློ་བར་དུ། ང་རང་ལོ་ན་བདུན་བརྒྱད་ལ་སོན་སྐབས་ཀྱི་བག་ཆགས་ཤིག་དྲན་པའི་ངོ་བོར་གསལ་ལེར་ཤར་བྱུང་། དེ་ནི་ང་དང་ངའི་ཨ་མྱེ་གཉིས་ཀྱི་ཕྱིར་དྲན་གྱི་ཀློང་ན་མཆིས་པའི་བགོད་བྲོ་བའི་གཏམ་རྒྱུད་ཅིག་ཡིན།

ངེད་གཉིས་ཀྱིས་འབྲོག་ཁུལ་ནས་ཡུལ་ཚོའི་ཐོག་ལ་ཅ་ལག་འགའ་སྐྱེལ་དུ་སོང་ཞིང་། སྐབས་དེར་འབྲོག་ཁུལ་ན་འཕྲུལ་ཆས་ཀྱི་རིགས་ཤིན་ཏུ་དཀོན་པ་མ་ཟད། འཁོར་འཕྲུལ་གྱི་ལམ་ཡང་ཡེ་ནས་མེད། དེ་བས་ངེད་གཉིས་རྟ་ལ་ཞོན་ཏེ། ཁལ་མ་བཅུ་བཅོ་ལྔ་ཡས་མས་དེད་ནས་སོང་།

ང་ནི་ཕ་འབྲོག་པའི་བུ་ཞིག་ཡིན་མོད། གཞོན་རྟ་ཞོན་པར་དེ་འདྲའི་ངར་རྒྱུ་མེད་པས།
རྒྱུན་དུ་རྟ་ཞོན་ཁར་སེམས་འཚབ་ཅིང་སུག་ཏི་སོགས་འདར་འདར་བྱེད་ཀྱིན་ཡོད། ངེད་གཉིས་ཡར་ཡོང་བའི་ལམ་སྐབས་ནས། ཆུ་བོ་ཞིག་ལ་བརྒལ་སྐབས“བླ་བྲང་གྭ་སེར”ཞེས་པའི་གཡག་ཅིག་ཡོད་པ་དེ་ཆུ་ཁུག་ཅིག་ལ་ཤོར་སོང་། ང་ནི་རྟ་ཁ་དཀྱུ་བར་སྐྲག་ཅིང་། ལྷག་པར་དུ་དེའི་སྐབས་དེ་ལ་རྟ་ཁ་དཀྱུ་དགོས་ན་ཤིན་ཏུ་སྐག་མོད་ཀྱང་། དཀྱུས་མ་ཕོད། ད་དུང་ཨ་མྱེར་ཡང་མ་བཤད། གལ་ཏེ་ངས་ཨ་མྱེ་ལ་བཤད་པ་ཡིན་ན། ཁོས་ང་རང་ལ་དེད་ཤོག་ཟེར་རྒྱུ་བསམ་ནས། ཡང་བཤད་མ་ཕོད། སྐབས་དེར་ཨ་མྱེ་ཁོས་ཀྱང་མ་རིག་པར་གཡག་རྒན་གནས་དེར་ལུས། ངེད་གཉིས་ཐོན་མཚམས་ཤིག་ནས་ཨ་མྱེས་གཡག་དེ་མེད་པར་མཐོང་ཞིང་། ང་ལ་དྲིས། ངས་གཡག་རྒན་ཤུལ་དུ་ལུས་སོང་བ་ཤེས་མོད། སྐབས་དེར་ངས་དྲང་བཤད་བྱེད་ཚེ། ཨ་མྱེས་ང་གདུག་པར་འདོད་ནས། ངས་མ་རིག་ཅེས་རྫུན་ལབ་པ་ཡིན། དེའི་རྗེས་ཨ་མྱེས་ངའི་སྔོན་ལ་གཞན་མིན་གཡག་དག་རྒྱབ་སྟེ་ཁོ་རང་ཕྱིར་གཡག་རྒན་དེ་འདེད་གི་སོང་། ཕལ་ཆེར་དུས་ཚོད་གཅིག་ཙམ་ནས་ཁོས་གཡག་དེད་དེ་ཕྱིར་ཐོན་ནོ། །

བྱང་ལྷས།

བརྩམས་ཆོས་རེ་རེའི་མཇུག་ཏུ“རང་ཤག་ཏུ་སྦྱར” རང་ཤག་ཏུ་བྲིས”ཞེས་རྒྱུན་པར་འབྲི་བཞིན་ཡོད་མོད། ཉིན་འགའི་སྔོན་དུ་དྲ་གྲོགས་ཤིག་གིས་དེ་རྣམ་དབྱེ་གཉིས་པ་ལས་སུ་བྱ་བ་མ་ཡིན་པར་ལབ་སོང་། སྐུ་ཉིད་ཀྱི་བསམ་ཚུལ་ཞིག་གསུང་རོགས། [来]

«གཙང་སྦྲ་བ་ཞིག་གི་མྱོང་སྣང་།»

༈ དབྱར་དུས་ཀྱི་ལྷ་ས་ནི་དེ་བས་མཛེས་སྡུག་ཡིད་དུ་འོང་བ་ཞིག་ཡིན་ལ་མི་རྣམས་ཀྱི་ཡིད་སྨོན་འཆོར་ས་ཞིག་ཀྱང་ཡིན། དེ་རིང་ཡང་ང་ཚོ་ནི་རྒྱུན་ལྡན་བཞིན་གྲོང་ཁྱེར་གྱི་གཞུང་ལམ་སྟེང་གཙང་སྦྲ་བྱེད་བཞིན་ཡོད་དེ་ནས་གློ་བུར་དུ་མི་རྣམས་ཀྱིས་བྲེལ་བྲེལ་ཟིང་ཟིང་ངང་ད་ནི་ཙམ་པ་སོགས་ཟ་བཅའ་གང་ཙམ་ཞིག་མ་ཉོས་ན་གྲོང་ཁྱེར་བཀག་འདོམ་བྱ་རྒྱུ་རེད་ཟེར་བའི་གཏམ་ངན་ཞིག་རླུང་འཁོར་བཞིན་འཁོར་ནས་ཡོང་། རང་ཡང་སེམས་ལ་བྲེལ་བ་ཞིག་ལང་སྟེ་ལས་མི་རོགས་པ་ཞིག་ལ་ཙམ་པ་ཞིག་མངག། ང་ཚོའི་ལས་ཀ་ནི་ཞོགས་པ་ཆུ་ཚོད་ལྔ་དྲུག་ཙམ་ནས་འགྲོ་དགོས་ལ་ཕྱི་དྲོ་ཡང་དགུ་པ་བཅུ་པ་ཙམ་ནས་ལས་མཚམས་འཇོག་གི་ཡོད། དེ་ཉིན་ཡང་ལས་མཚམས་བཞག་སྟེ་ལོག་འགྲོ་སྐབས་ང་ཚོའི་སྡེ་ཁུལ་གྱི་སྒོ་འགྲམ་མི་ཚོགས་ཀྱིས་ཁེངས་ཤིང་དེར་ཆུ་ཚོད་གཅིག་ཙམ་ལུས་དེར་ནི་སྒོ་སྲུང་བ་ཚོས་མི་རེ་རེ་བཞིན་དུག་སེལ་བྱེད་བཞིན་འདུག་ལ་འཚང་ཀ་དང་གློག་འཁོར་སྦག་སྦག་སོགས་ཀྱིས་ཟིང་ཆེན་པོ་ཡང་འདུག་ནང་དུ་ལོག་རྗེས་ཙམ་པ་དེ་ཡང་འབྱོར་ནས་བྱུང་། དེ་ནས་རིམ་པ་བཞིན་བཀག་རྒྱ་དམ་དུ་བཏང་སྟེ་ཕྱི་ཕྱོགས་ཀྱི་འགྲོ་འོང་བཀག་པ་ཙམ་མ་ཟད་ནང་ལོགས་སྡེ་ཁུལ་ཕན་ཚུན་ཡང་འགྲོ་འོང་བཀག་སྟེ་གྲོང་ཁྱེར་ནང་ལམ་ཟུར་གཡས་གཡོན་གྱི་གློག་སྒྲོན་གསལ་ཞིང་ནམ་རྒྱུན་འདུ་ཚོགས་ཤིན་ཏུ་ཆེ་བའི་གཞུང་ལམ་དེ་ཡང་འཇམ་ཐིང་ངེར་གནས། ང་ཚོ་ནི་སྔར་བཞིན་ཞོགས་པ་སྔ་པོ་ནས་ལང་སྟེ་གཞུང་ལམ་སྟེང་དུ་གཙང་སྦྲར་བསྐྱོད་པ་ཡིན། རྒྱ་ལམ་རྣམས་ནི་ནམ་རྒྱུན་དང་མི་འདྲ་བར་ཐང་བདེ་བའི་དབེན་གནས་ཞིག་དང་འདྲ་བར་ཁུ་སི་མིར་གནས་ཞིང་ང་ཚོ་འགྲོ་བའི་རྡོག་སྒྲ་དང་བྱ་བྱིའུ་སོགས་ཀྱི་སྐད་སྒྲ་ནི་རྒྱུན་གཏན་ལས་ཆེ་བར་སྣང་ཞིང་ཕྱག་མའི་སྒྲ་ནི་དེ་བས་ཀྱང་རྣ་ལམ་ལ་ཟན་པ་ཞིག་འདུག

དེ་དུས་ཀྱི་ཚོར་སྣང་དེ་བས་བརྗོད་མི་ཤེས་པ་ཤིག་དང་དངངས་ཚབས་ཤིག་གིས་སྙིང་གི་འཕར་སྒྲ་ཡང་ཅུང་ཆེ་རུ་ཕྱིན་པ་འདྲ། ཐོག་མར་ང་ཚོ་ཉི་ཕྱེད་ཙམ་ནས་ལས་མཚམས་འཇོག་པ་དང་དུས་ཐོག་ཏུ་བརྟག་དཔྱད་བྱེད་དགོས་པ་ཙམ་ལས་དེ་ཙམ་གྱི་བྲེལ་བ་མི་ཆེ་ཡང་ལོགས་སུ་བཀར་ས་དང་སྡེ་ཁུལ་སོགས་ཀྱི་གད་སྙིག་ཕུང་གསོག་ཐེབས་ཚད་ཇེ་ཆེར་ཕྱིན་པས་ང་ཚོ་ཡང་ཁག་དགོས་ཀྱིས་སྐབས་རེ་ནད་པ་ལོགས་སུ་བཀར་ས་དང་སྐབས་རེ་སྡེ་ཁུལ་གང་སར་གད་སྙིག་གཙང་མ་བཟོ་བ་འགྲོ་དགོས་སྟབས་ཉི་མོ་ཙམ་མ་ཟད་མཚན་མོ་ཡང་ལས་ཀ་མང་པོ་བྱེད་དགོས་ཀྱི་འདུག སྐབས་དེར་ཁ་ལག་རག་ཁག་པོ་འདུག་ལ་དཀའ་ངལ་ཡང་ཆེ་བས་ནང་དུ་ལོག་སྟེ་ཉལ་ཆས་ལྟ་བུར་སྙེས་ཙམ་ནས་གཉིད་དུ་འགྲོ་ཡི་འདུག ནད་ཡམས་ཀྱི་གནས་ཚུལ་ཛ་དྲག་ཇེ་ཆེར་འགྲོ་བས་སེམས་ལ་སྐབས་རེ་ཞེད་སྣང་ཡང་ཡོང་གི་འདུག

བཀག་རྒྱ་ཇི་ཙམ་བསྡམས་ཀྱང་ང་ཚོ་ནི་ཕྱི་ལོགས་སུ་ལས་ཀར་ཕྱིན་ནས་ལོག་དགོས་པས་བཀག་རྒྱར་གནས་པའི་ནང་ལོགས་ཀྱི་མི་ཚོས་བསམ་འཆར་དང་ཚིག་མཚོན་ཡང་འདེབས་ཀྱིན་འདུག་དེ་ལ་ང་ཚོའི་ཕྱོགས་ནས་ཚིག་ཟ་དང་གོ་རྒྱུ་འདྲ་ཡང་བཤད་སོང་། འོན་ཀྱང་སྐབས་དེའི་དགོས་མཁོ་ལ་གཞིགས་ནས་གོང་རིམ་ནས་ང་ཚོ་ནི་ཕྱི་ལོགསུ་གནས་སྡོད་བྱ་དགོས་པའི་བརྡ་བཏང་སྟེ་ཚེས་གསུམ་ཐང་གི་མཚམས་ཀྱི་མགྲོན་ཁང་ཞིག་ཏུ་གོ་སྒྲིག་བྱས་འདུག དེར་ཉལ་ས་ཙམ་ལས་ཟ་འཐུང་སོགས་སོ་སོས་ཐག་གཅོད་བྱེད་དགོས་པའི་རྐྱེན་གྱིས་ཟ་ཁང་ཚོང་ཁང་ཚང་མ་སྒོ་བརྒྱབ་ཡོདཔས་ན་ཙམ་པ་ཏོག་ཙམ་ཁྱེར་ཡོད་པ་དེས་ཕན་ཐོག་པོ་བྱུང་། ང་ཚོ་ནི་སྔར་ལང་ཕྱི་ཉལ་གྱིས་ལས་ཀ་ནི་སྔར་བཞིན་བྲེལ་ཚུབ་ཆེ་ལ་ཛོར་ས་གང་ཡིན་ཡང་འགྲོ་དགོས་པའི་བརྡ་འབྱོར་ན་དེར་འགྲོ་དགོས། ཐེངས་ཞིག་སྟོད་ལུང་དུ་ནད་པ་ལོགས་སུ་བཀར་སའི་ས་ཚིགས་ཤིག་ཏུ་གཙང་སྦྲ་བྱེད་པར་ཕྱིན་པ་ཡིན་དེར་ནི་ནད་པ་མང་པོ་འདུག་སའི«བོད་སྨན་རྒྱལ་སྤྱེའི་སྤེལ་རེས་ཉོ་ཚོང་ལྟེ་གནས»ཟེར་བ་དེ་རེད། དེའི་ནང་ལོགས་དང་ཉེ་ཁོར་སོགས་སུ་གཙང་སྦྲ་བྱེད་སྐབས་ཤིན་ཏུ་དྲི་ངད་ཆེ་བའི་གད་སྙིག་མང་པོ་གཙང་མ་བཟོ་དགོས་བྱུང་བས་དེ་ཉིན་ང་ཚོའི་ལས་རོགས་མང་པོར་ཆམ་པ་ཕོག་པ་འདྲ། ཕྱི་ཉིན་ང་ཚོའི་ལས་རོགས་མང་པོ་ཞིག་གི་བརྟག་འབྲས་དམར་པོ་ཆགས་པས་ཚང་མ་དངངས་ཚབ་ལང་ཡང་ཕན་ཚུན་སེམས་གསོ་བའི་སྐད་ཆ་ཕྲན་བུན་རེ་བཤད་རེས་བྱས། དེ་ནས་ང་ཚོ་ལོགས་དབྱེར་བྱེད་སར་འགྲོ་དགོས་པའི་བརྡ་འབྱོར་བས་གཏོར་གཟུགས་མགྲོན་ཁང་མཚམས་ཀྱི་ལོགས་དབྱེའི་ས་ཚིགས་སུ་སྦྱོར། དེར་ནི་མི་ཚོགས་མང་ལ་དེ་ཙམ་གྱིས་དམ་དྲག་མེད་པ་དང་བག་ཡངས་པོ་ཞིག་བྱུང་བས་སེམས་ཀྱི་དངངས་ཚབ་ཀྱང་ཞི་ནས་རེ་ཞིག་རང་ཉིད་དེར་ཅི་བྱེད་མཁན་ཡིན་པ་ཡང་བརྗེད་ནས་འདུག
__________________________༢༠༢༢ / ༩ / ༡༤/ཉིན།